09.05.2018
ISLOM KARIMOV REJIMINING QATAG‘ONLARI E’TIROF QILINSIN, ULARNING QURBONLARI OQLANSIN!
9 May “Xotira va Qadrlash Kuni” munosabati bilan
Islom Karimovning 27 yil (1989-2016) davom etgan yakkashaxs diktaturasi O‘zbekiston xalqiga mislsiz moddiy va ma’naviy zararlar yetkazdi:
1. O‘zbekistonda mafkurasizlik, fikrsizlik, e’tiqodsizlik yoyildi, ommaviy axborot vositalari mutlaq senzura qilindi, O‘zbekiston televideniyesi, gazetalari va boshqa OAV o‘lik holga keltirildi. Ularga sarflangan moddiy imkoniyalar esa isrof bo‘ldi va qilindi.
2. Siyosat sohasi o‘lik holga keltirildi: O‘zbekiston Oliy Majlisi o‘lik holga keltirildi, soxta, cho‘ntak siyosiy partiyalar ishtirokida soxta saylovlar va referendumlar o‘tkazildi. O‘zbekiston Konstitutsiya qo‘pol ravishda buzilib kelindi, shu tariqa Karimov 4 marta soxta saylovlarda Prezident sifatida “saylandi” va 2 marta soxta referendumda uning vakolatlari uzatildi.
3. Chuqur iqtisodiy tanazzul, butun sohalarni qul qilib olgan poraxo‘rlik, davlat va xalq mulkini talon taroj qilish. Tadbikorlikning, ijara va xusumiy mulkchilikning yo‘qqa chiqarilishi. Xalq va lavlat boyligining asosan Karimov va oilasi, ularning yaqinlari, davlat va hukumatning boshqa rahbarlari, viloyat va tuman hokimlarining qo‘lida to‘planishi.
4. Qonuniy asosda faoliyat olib bormagan MXXning mislsiz zulmi va poraxo‘rligi, davlat boshqaruvini ichkaridan qo‘lga olishi. Ichki Ishlar va Prokuraturaning zulmi va poraxo‘rligi.
5. Maorif va ta’lim tizimining ishdan chiqishi, poraxo‘rlik markaziga aylantirilishi. Alifbo o‘yini, ya’ni Kiril va Lotin harflaridan birini 20 yildan ko‘p vaqt davomida maxsus tanlamay, bu sohada chalkashlik chiqarish bilan O‘zbek tilining inqirozga uchrashiga sabab bo‘lish.
6. Din sohasining “bo‘tqa diniga” aylantirilishi.
7. 10 minglarcha siyosiy va diniy muxoliflarning Jasliq va boshqa qamoqxonalarga tashlanishi va qiynoqqa solinishi, o‘ldirilishi. Ularning bir qismi hali ham qamoqxonlarda saqlanmoqdadir.
8. Eng kamida 5 Million O‘zbekiston fuqarolarining chet ellarga ish ishlab ketishi, bu davlatlarda haq huquqsiz xo‘rlanishi, Karimovning ularni dangasalar, deb haqorat qilishi.
9. Gulnora Karimovaning taxminan 1 Milliard dollar va MXX generali, O‘zbekiston qahramoni (?) Shuhrat G‘ulomovning 1 Milliard dollar va eski Bosh Prokuror Rashitjon Qodirovning 500 million dollarga yetgan xalq va davlat pulini o‘g‘irlashlari, bu pullarni chet ellarga olib ketishlari.
10. O‘zbekistondagi ijtimoiy siyosiy hayotning tamoman izdan chiqarilishi, jamiyatning biror sohasida tiriklik muhitning qoldirilmaganligi, o‘zaro ishonchning yo‘qotilishi, yolg‘on va ma’naviyatsizlikning targ‘ib qilinishi va tarqalib ketishi.
11. O‘rta Osiyo xalqlari va davlatlari bilan dushmanlarcha munosabatlar o‘rnatilishi, chegaralarning yopib qo‘yilishi va minalashtirilishi, O‘zbekistonning qurshovga (izolatsiyaga) mahkum qilinishi.
12. Adabiyot va madaniyat sohasining chuqur tanazzulga uchratilishi, iste’dodli va qobiliyatli ijodkorlarda tashabbus va ijod kayfiyatining yo‘q qilinishi.
13. Yosh avlodning ilmsiz, e’tiqodsiz va hech qanday dunyoqarashga ega bo‘lmagan, Karimov shaxsiga sig‘inish mohiyatda soxta “Otamiz”, “Dodamiz” kabi tushunchalar bilan voyaga yetkazilishi.
14. So‘z, fikr, matbuot, siyosiy erkinliklar, iqtisodiy taraqqiyot, Yalpi Ichki Mahsulot (kishi boshiga ming dollarda ham kam, masalan Qozog‘istonda bu ko‘rsatkich 10 ming dollar atrofida) va poraxo‘rlik ko‘rsatkichlarida O‘zbekistonning dunyodagi 200 davlatdan 170 o‘rinda qolib ketishi (bu ma’lumotlar ham rasmiydir).
15 O‘zbekistonning dunyoda eng mash’um diktatorlik va zulm davlati, deya tanilishi.
16. Turkiya va Islom dunyosi bilan aloqalarning buzilishi.
17. O‘n minglarcha O‘zbek ayollarining chet ellarda arzon cho‘rilar va fohishalar sifatida “mashhur” bo‘lishi.
18. O‘zbekistonda davlat idoralari xizmatchilari, o‘rta va oliy ilm dargohlari talabalari va maktab o‘quvchilarining paxta dalalarida va boshqa ishlarga majburan jalb qilinishi va qullar kabi ishlatilishi.
19. Tinch siyosat bilan shug‘ullangan O‘zbek muxolifatining badnom etilishi va chеt ellarga surgun qilinishi va tinch da’vat bilan shug‘ullangan musulmonlarning fundamentalist, radikal va terrorchi, deya e’lon qilinishi, mamlakatimizda va chet davlatlarga ularga suiqasdlar qilib, ba’zilarining o‘ldirilishi yoki og‘ir yarador qilinishi.
20. Hukumat ichida qo‘rquv muhitining yaratilishi, zamonaviy ilmli va mutaxassis kadrlar yetishtirishning yo‘qqa chiqarilishi, ko‘plab kadrlarning qamoqqa tashlanishi…
21. O‘zbekistonning oltin, uran, tabiiy gaz va boshqa tabiiy boyliklari Karimov rejimi tarafidan yashirincha talon taroj qilindi yoki bu rejimning manfaati uchun ishlatildi. Xalq esa bu boyliklardan foydalana olmadi, o‘zimizda gaz bo‘lgani holda qish kunlari insonlarimiz sovuqda titrashga majbur qilindi. Natijada insonlarimizning, ayniqca bolalarimizning sog‘ligiga zarar yetkazildi…
Diktator Islom Karimov va uning rejimining O‘zbekiston xalqi va davlatiga qarshi bunday jinoyatlari hozirgi Prezident Shavkat Mirziyoyev tarafidan ham e’tirof qilinmoqda.
Musulmonchilikda zolim Fir’avnlar, ya’ni diktatorlarning bunday zulmlarini tirikligida ham, o‘likligida ham fosh qilish, insonlarni ulardan ogohlantirish bunday zulmlar takrorlanishiga yo‘l qo‘ymaslik uchun zaruriy hisoblanadi.
Shuning uchun ham O‘zbekistonning hozirgi hukumati Islom Karimov rejimining qatag‘onlarini xuddi bir paytlar Stalin rejimi qatag‘onlari kabi rasman e’tirof qilishi, bu qatag‘onlarning qurbonlarini oqlashi, ularni moddiy va ma’naviy qo‘llab quvvatlashi lozim. Islom Karimov davrida nohaq qamoqqa tashlangan va hozir ham qamoqda qolayotgan musulmonlar darhol ozod qilinishi kerak.
Bu qadam O‘zbekistonda boshlangan islohotlarning haqiqiyliga bir dalil bo‘ladi, xalqimizning islohotlarga bo‘lgan ishonchini ortiradi, mamlakatimizda ijtimoiy siyosiy barqarorlik va kelishuvni kuchaytiradi va davlatimizning xalqaro maydondagi obro‘yini ortiradi.
Namoz NORMO‘MIN
09.05.2018
ИСЛОМ КАРИМОВ РЕЖИМИНИНГ ҚАТАҒОНЛАРИ ЭЪТИРОФ ҚИЛИНСИН, УЛАРНИНГ ҚУРБОНЛАРИ ОҚЛАНСИН!
(Кирил ва Лотинда)
9 Май “Хотира ва Қадрлаш Куни” муносабати билан
Ислом Каримовнинг 27 йил (1989-2016) давом этган яккашахс диктатураси Ўзбекистон халқига мислсиз моддий ва маънавий зарарлар етказди:
1. Ўзбекистонда мафкурасизлик, фикрсизлик, эътиқодсизлик ёйилди, оммавий ахборот воситалари мутлақ цензура қилинди, Ўзбекистон телевидениеси, газеталари ва бошқа ОАВ ўлик ҳолга келтирилди. Уларга сарфланган моддий имкониялар эса исроф бўлди ва қилинди.
2. Сиёсат соҳаси ўлик ҳолга келтирилди: Ўзбекистон Олий Мажлиси ўлик ҳолга келтирилди, сохта, чўнтак сиёсий партиялар иштирокида сохта сайловлар ва референдумлар ўтказилди. Ўзбекистон Конституция қўпол равишда бузилиб келинди, шу тариқа Каримов 4 марта сохта сайловларда Президент сифатида “сайланди” ва 2 марта сохта референдумда унинг ваколатлари узатилди.
3. Чуқур иқтисодий таназзул, бутун соҳаларни қул қилиб олган порахўрлик, давлат ва халқ мулкини талон тарож қилиш. Тадбикорликнинг, ижара ва хусумий мулкчиликнинг йўққа чиқарилиши. Халқ ва лавлат бойлигининг асосан Каримов ва оиласи, уларнинг яқинлари, давлат ва ҳукуматнинг бошқа раҳбарлари, вилоят ва туман ҳокимларининг қўлида тўпланиши.
4. Қонуний асосда фаолият олиб бормаган МХХнинг мислсиз зулми ва порахўрлиги, давлат бошқарувини ичкаридан қўлга олиши. Ички Ишлар ва Прокуратуранинг зулми ва порахўрлиги.
5. Маориф ва таълим тизимининг ишдан чиқиши, порахўрлик марказига айлантирилиши. Алифбо ўйини, яъни Кирил ва Лотин ҳарфларидан бирини 20 йилдан кўп вақт давомида махсус танламай, бу соҳада чалкашлик чиқариш билан Ўзбек тилининг инқирозга учрашига сабаб бўлиш.
6. Дин соҳасининг “бўтқа динига” айлантирилиши.
7. 10 мингларча сиёсий ва диний мухолифларнинг Жаслиқ ва бошқа қамоқхоналарга ташланиши ва қийноққа солиниши, ўлдирилиши. Уларнинг бир қисми ҳали ҳам қамоқхонларда сақланмоқдадир.
8. Энг камида 5 Миллион Ўзбекистон фуқароларининг чет элларга иш ишлаб кетиши, бу давлатларда ҳақ ҳуқуқсиз хўрланиши, Каримовнинг уларни дангасалар, деб ҳақорат қилиши.
9. Гулнора Каримованинг тахминан 1 Миллиард доллар ва МХХ генерали, Ўзбекистон қаҳрамони (?) Шуҳрат Ғуломовнинг 1 Миллиард доллар ва эски Бош Прокурор Рашитжон Қодировнинг 500 миллион долларга етган халқ ва давлат пулини ўғирлашлари, бу пулларни чет элларга олиб кетишлари.
10. Ўзбекистондаги ижтимоий сиёсий ҳаётнинг тамоман издан чиқарилиши, жамиятнинг бирор соҳасида тириклик муҳитнинг қолдирилмаганлиги, ўзаро ишончнинг йўқотилиши, ёлғон ва маънавиятсизликнинг тарғиб қилиниши ва тарқалиб кетиши.
11. Ўрта Осиё халқлари ва давлатлари билан душманларча муносабатлар ўрнатилиши, чегараларнинг ёпиб қўйилиши ва миналаштирилиши, Ўзбекистоннинг қуршовга (изолацияга) маҳкум қилиниши.
12. Адабиёт ва маданият соҳасининг чуқур таназзулга учратилиши, истеъдодли ва қобилиятли ижодкорларда ташаббус ва ижод кайфиятининг йўқ қилиниши.
13. Ёш авлоднинг илмсиз, эътиқодсиз ва ҳеч қандай дунёқарашга эга бўлмаган, Каримов шахсига сиғиниш моҳиятда сохта “Отамиз”, “Додамиз” каби тушунчалар билан вояга етказилиши.
14. Сўз, фикр, матбуот, сиёсий эркинликлар, иқтисодий тараққиёт, Ялпи Ички Маҳсулот (киши бошига минг долларда ҳам кам, масалан Қозоғистонда бу кўрсаткич 10 минг доллар атрофида) ва порахўрлик кўрсаткичларида Ўзбекистоннинг дунёдаги 200 давлатдан 170 ўринда қолиб кетиши (бу маълумотлар ҳам расмийдир).
15 Ўзбекистоннинг дунёда энг машъум диктаторлик ва зулм давлати, дея танилиши.
16. Туркия ва Ислом дунёси билан алоқаларнинг бузилиши.
17. Ўн мингларча Ўзбек аёлларининг чет элларда арзон чўрилар ва фоҳишалар сифатида “машҳур” бўлиши.
18. Ўзбекистонда давлат идоралари хизматчилари, ўрта ва олий илм даргоҳлари талабалари ва мактаб ўқувчиларининг пахта далаларида ва бошқа ишларга мажбуран жалб қилиниши ва қуллар каби ишлатилиши.
19. Тинч сиёсат билан шуғулланган Ўзбек мухолифатининг бадном этилиши ва чет элларга сургун қилиниши ва тинч даъват билан шуғулланган мусулмонларнинг фундаменталист, радикал ва террорчи, дея эълон қилиниши, мамлакатимизда ва чет давлатларга уларга суиқасдлар қилиб, баъзиларининг ўлдирилиши ёки оғир ярадор қилиниши.
20. Ҳукумат ичида қўрқув муҳитининг яратилиши, замонавий илмли ва мутахассис кадрлар етиштиришнинг йўққа чиқарилиши, кўплаб кадрларнинг қамоққа ташланиши…
21. Ўзбекистоннинг олтин, уран, табиий газ ва бошқа табиий бойликлари Каримов режими тарафидан яширинча талон тарож қилинди ёки бу режимнинг манфаати учун ишлатилди. Халқ эса бу бойликлардан фойдалана олмади, ўзимизда газ бўлгани ҳолда қиш кунлари инсонларимиз совуқда титрашга мажбур қилинди. Натижада инсонларимизнинг, айниқча болаларимизнинг соғлигига зарар етказилди…
Диктатор Ислом Каримов ва унинг режимининг Ўзбекистон халқи ва давлатига қарши бундай жиноятлари ҳозирги Президент Шавкат Мирзиёев тарафидан ҳам эътироф қилинмоқда.
Мусулмончиликда золим Фиръавнлар, яъни диктаторларнинг бундай зулмларини тириклигида ҳам, ўликлигида ҳам фош қилиш, инсонларни улардан огоҳлантириш бундай зулмлар такрорланишига йўл қўймаслик учун зарурий ҳисобланади.
Шунинг учун ҳам Ўзбекистоннинг ҳозирги ҳукумати Ислом Каримов режимининг қатағонларини худди бир пайтлар Сталин режими қатағонлари каби расман эътироф қилиши, бу қатағонларнинг қурбонларини оқлаши, уларни моддий ва маънавий қўллаб қувватлаши лозим. Ислом Каримов даврида ноҳақ қамоққа ташланган ва ҳозир ҳам қамоқда қолаётган мусулмонлар дарҳол озод қилиниши керак.
Бу қадам Ўзбекистонда бошланган ислоҳотларнинг ҳақиқийлига бир далил бўлади, халқимизнинг ислоҳотларга бўлган ишончини ортиради, мамлакатимизда ижтимоий сиёсий барқарорлик ва келишувни кучайтиради ва давлатимизнинг халқаро майдондаги обрўйини ортиради.
Намоз НОРМЎМИН
09.05.2018
